過大禮@27.01.2013

過大禮@27.01.2013
早一日的星期六走遍整個荃灣買東買西

- 2盒奇華唐餅
- 花膠
- 冬茹
- 2罐飽魚
- 元貝
- 髮菜
- 蠔鼓
-2支FOV (張爸爸私伙)
- 1個中果藍
- 女家囍帖
- 餅咭、唐餅咭
- 禮金大利是
- 2封舅仔利是
- 包羅萬有利是

女家回禮：囍字發糕，龍鳳被套裝、禮金回禮利是、包羅萬有回禮利是、女婿利是

星期六張媽媽幫我地羅左1d回家先，我地之後再買果藍，那個果藍真係好重呀。
過大禮張生，張哥哥和張爸媽每人羅1d上巴士。辛苦晒！哈哈！！！

呢張相星期六晚係張生家影，可惜第2日到女家，送禮後我竟然腦海一片空白，忘記了影相。
每樣都回6pcs，因張生爸媽到酒樓羅位先，所以我們急急回好禮就出門去茶樓。
過大禮當日，亦係雙方家長第1次見面，其實之前張爸媽都話要約飲茶，不過諗住過大禮個日一次過見面連飲茶。
好彩過程都好順利！！


派帖@28.01.2013
是日派帖烏龍百出！

一早等老細回來後跟她講聲，再預先同2位同事夾好一會分唐餅，就宣佈要派帖和請吃唐餅，其實大部分同事都知，但有幾個事先就一點都唔知。
大家都好開心去接炸彈。

我公司係家族生意，我老細係大家姐、重有2個細佬老細，爸媽就係最大老細。
不開始問左幾個同事使唔使俾帖給爸媽大老細，有d話要有d話只俾餅咭，因爸大老細長駐國內都唔會來，我初時就諗住唔想人家唔來都要回禮。
所以最後決定只俾多張餅咭給我老細，話請她爸媽吃餅。
到了下午，老細老公就話我應該要俾帖，唔好理他們來唔來都要俾，要俾人睇下，同埋封返個小禮給你。
我其實一早寫好了，到昨早才決定只抽張餅咭出來。
唉！我老細話我傻，封禮係好正常。老細老公話媽媽可能會同我老細一家來嘛，係喎！我完全忘記我老細和她媽媽都係一齊出入，同埋我老細應該會連埋兩個仔來，她媽媽自然都會一齊來，平時公司吃飯都係咁既組合。
所以我即刻補帖，現家連大細佬老細(管廠)都要俾帖，老細話禮貌上要俾帖，來唔來另一回事。

到了晚上，跟大學同學吃飯，因同學3月頭就生bb，紅撞紅，所以我又是唔敢俾帖，我大人唔怕，但一定要顧及她bb，所以一早又係只預備餅咭，連囍封都唔敢用，師兄就用個囍封和放1張save date card連餅咭，因他當日教會easter event都係來唔到。

到派咭時，同學又問點解無帖，她要睇我張帖，我話唔敢俾你，同埋唔使回禮，只想請你吃餅。
跟住她話她要帖，她話唔怕，我就即場俾save date card，跟住又話要，又俾張帖，用個囍封，既然樣樣齊，又要俾埋回禮利是。
哈哈！原來她一早準備好送禮，所以一定要我俾齊一套帖給她。

哎呀！我真係未見人這樣派帖，逐樣野，即場寫名，連貼紙都無。
真係不好意思！十萬個感謝她的大禮。亦期待見她的bb。



好彩我隨身都keep住10sets spare，但真係無預到會一日中2次這樣補帖的情景。

但我真的很感謝你們每一位的祝褔和來臨！！

可能我真的要逢人派帖才對，哈哈！！說笑，真的不想亂炸到別人！！

2個月進度@CS wedding

自抄網上template的save date card，終於搞掂了。
多謝Dennis的原稿設計檔，再加張生自下載中文字款做中文版。
第1次去晒4R，原來個檔唔係3:2/1800x1200，回到家又麻煩Dennis再整過個檔案，再由張生再整過中文版。
最後上星期六終於羅到相喇！
我地晒絨面(不是光面)，貴多$0.1， $0.8@，效果都不錯。放落帖內一起派。


12月19日3個姊妹試了身，size都好fit，改短少少就可以。左1姊妹因後期揀了貴一點個款，所以質料都唔同，出來效果真係唔同色，不過無所謂，都係差少少。
因她不喜歡common既款，哈哈！！
我昨日還courier到Z Wedding收了呢3條改好的裙回來。
重有1個姊妹就新年後才去試身。

張生係1月12日都揀埋bigday租的禮服，連自己訂做的黑色禮服，有2套衫一定夠晒。

同日還係金都Sun Beauty租埋車，

$2580 S Class 3 hrs, 28van 5hrs都叫全場最抵，因表妹上年10月結婚都係用呢間，我坐過都叫ok，所以就book埋。煩少一樣野！


hehe~~~~我又中Chocol BB Drink event，今次重要係180支/6月，正呀！

今個星期日過大禮，下星期4晚都有飯局派帖。
但其實重有好多濕碎野未做。

訂酒
驗身
最後fitting兼未來99揀衫 (已book時間11am, 23/2/13)
成長片段 (張生開始研究中)
當晚歌曲播放
愛的宣言板 (可能叫Dennis或張生做，再去bannershop印)
同攝影師夾run down
約姊妹傾流程、遊戲

婚後家用topic

呢個topic，真係無諗過會咁煩惱？！

女家個邊，我一向都負擔大d，因我做大，咁多年都係俾得較高既數目，結婚後仍不打算減。
或者等幾年我細弟都出身，而又有小朋友才會打算。

但星期六晚，未來99突然係家庭飯開始前，當住十幾人(2姐一哥連家人)講，我地3月要加家用，張生要俾多3K家用，其他咩都唔使理，包晒。
那刻，所有人都好尷尬，無人預算她講呢d野，我和張生事前仍唔知呢d野。

聽後，個個都O嘴。
那餐飯，我連夾食送都唔敢。

我心諗，我1個人不是吃好多？用太多？
我係他家時都好自律，無出過半點聲氣，他們怎樣就怎樣。

雖然我是帶飯的人，但我帶既飯和食送都很少，有時夾既份量還比係我家少，就係自己都唔敢亂來。
現家都只是1星期1、2晚，原就打算來讓大家習慣下。

其實加家用，都預左，但無諗過加3K，現家張生俾的亦不少。

他們話d野貴晒，但最貴都是每星期六的家庭飯，那將全家既通脤都加到我們的身上嗎？！

雖說我們搬出去3K一定唔得，但一起住亦不用計得那樣足？

那餐飯後，心情沒好過，一下子咩心機都無晒。

之前還計劃努力儲2-3年錢，自己再等時機買樓，現家甚麼都不用諗。


後記>>>>>
昨晚張生同兩老私下傾，最後變為1k，下年再加1k，
雖然未來99唔高興，但幸好未來62幫口，所以暫時搞掂。

希望他倆明白，我們其他方面都會幫手，同埋希望儲多d錢，來緊小朋友和將來打算。

暫時總算鬆一口氣！

擬結婚証書申請表@証婚流程

之前都無講証婚，因一早已確認了張生細姐夫杜生來擔任我們的婚宴。

他姐夫係事務律師，呢幾年還做埋証婚律師，因為係親戚，所以絕對唔怕亦無需要擔心甚麼。

他姐夫是一個很有紀律，平時還帶點嚴肅，但他對住1對仔女又可以係一個大細路，一起玩，又教得一對仔女讀書好叻，有教養。

今個星期一我們終於填好擬結婚証書。

杜生事前已問過我地要嚴肅版，定輕鬆開心版，我們就齊聲說開心版。
他還說可以同mc夾，因那個時刻一定係只玩新郎，哈哈，我地話簡單點就得。

話說杜生係一個好正直既人，他一向都唔收利是，因他認為收了律師費就是包了所有，所以他從來都唔任何利是。但當然他說過不可加宗教詞語就一定不可以加，因律師証婚跟教堂絕對是兩回事。

他真的好好，他連$305都不收我們，因他話他有d熟人都是唔收，當做賀禮。
加上我地叫得他姐夫，他就更加不會收，他真的好好人，我擾讓了一會，都知道他說了就不會收的。所以當晚吃完家庭飯就請他1對仔女吃雪糕。




他循例都俾返相關需知和流程給我們。
誓詞都有，當時他重話我地可以改，因法例那個好簡短，呢個係他編的，只要我地唔加入任何宗教字眼就無問題，但我地那刻都話唔使改，照跟就可以。



怎知之後睇到尾2個句真係好爆笑，哈哈！！點講出來？！
現家都唔知改唔改好，哈哈！呢個應該係輕鬆版的既定誓詞，哈哈！！

婚後物資~紫色晚裝&長拖尾婚紗 (Sold)

90%new 紫色晚裝$180：
可做姊妹裙、親戚晚裝或Pre-wedding晚裝。
我當親戚晚裝和Pre-wedding。

M size
162cm高+3吋鞋 (少少貼地)，影pre-wedding晚裝貼地先靚，當時做特登貼地
胸34"吋左右
腰位25"-28"也可以，因高腰款。
全部有得改。


remark:心口珠片用線釘實了，不會掉，但有幾粒掉了，但影相和實物唔覺，因唔係水晶，普通珠片仔。
著了2次pre-wedding+晚宴2小時，好新淨。

有意PM我。

影pre-wedding既拖地婚紗都會賣埋，間屋無地方放，加上bigday會影褂裝，婚紗已經無用，放係家都係無用，婚紗因為著過幾次，個底有少少污漬，現家再平d買，但手工好靚，一定唔係淘寶，我同hk freelancer 買的，是她design的款，再經做海外婚紗既廠做，好靚好好手工。有興趣都可以pm我。

準備過大禮和派貼

好快就到我過大禮，之前見到一班1月、3月blog友都陸續過大禮。
我就月尾27/1過大禮


昨午星期日突然收到電話，貼已印好，可隨時羅，我一聽完個電話，就同張生搭mtr出去，係TW去，好方便。
昨晚先羅d餅咭出來入好信封，準備用來過大禮，我之前都唔知做咩，哈哈，好多濕碎野都無整。
其實都一早叫張生叫張爸羅$10新銀紙，而張爸就今日先去保險箱羅，因之前裝修，所有野都放晒係保險箱，順便數埋有幾多新銀紙，因來緊新年和我地結婚都要大量銀紙呀！！哈！

之前係網上做了一個save date card，但因為resolution太低，不可以羅去晒相或印制。
然後叫了朋友幫我用ps跟原稿做一張出來，多謝Dennis你的幫助，幫我整完又改又加內容，現家就到張生下載緊字款做埋中文版就羅出去晒4R，放係喜貼內。
昨日係MK格價，最平都係$0.7第2日取。呢個價都ok!

 

這陣子任都開始整一些濕濕碎的，筆黏了好多次才完全黏實，台號就暫時未得，試左一張失敗了。

跟住先發覺用A4(4格)既label print，就唔使自己cut得咁辛苦。
但咭紙都係要一開四，未諗到點搞，唔知有d細張d既咭紙賣？！？！

 

在家睇煙火@our room

31/1/2012 ~ 2012這年就這樣過去了。

這一年我們經歷了很多，年初為左住屋就吵了一場，到求了婚後，又為日子吵了一場，再經歷差點唔結就分的冷戰、大家面對面好好傾，再去向雙方父母講：我們最終都決定結婚，我們會用自己的努力，將來買樓。

看似經歷了很多，又或是三言兩語輕鬆地說過去，可是頭半年真的一點都不快樂。

幸好，我倆最後都沒放棄大家，大家經歷了好好的幾輪傾談後，我們2個更明白對方，了解對方，並想好用自己方法去實現我們的願望。
所以自5月，最終我們自己去擇好日子後，不知是擇日子的功勞，還是大家都好像無了負擔，比之前更了解，更珍惜對方，其後的準備都很順利，所有野都有共識地進行到今天。

想起當日5月20日訂了酒席，那時還有300天，到200天，到100天，再到今天 86天..............
時間真的過得很快，轉眼間時間剩下3個月唔夠。很感恩，主讓我倆順利地進行我們的婚禮準備。

其後與雙方家長亦算順利地相處良好，現在總算6299都對我好好，他們家都裝修好，他哥哥又幫我們整好晒所有配備。真的很感謝他們。

31/12~原是約好朋友晚飯後才回家，怎知中午飯後，突然肚痛肚all左3個鐘，痛到整個人說不出話，離唔開個toilet，最後5點先去到睇醫生，所以與張生回我家，叫媽媽煮白粥給我吃，還打算當晚唔回青衣家。但自睇完醫生後，肚子無再劇烈抽住痛，到9:30pm，又與張生回了青衣家，我們一起係房睇煙火和倒數(其實掛住影相都無倒數)，哈哈！

Our room 的view ~這是張生用相機影的，新年看煙花會更清楚。

這是我用mobile拍的，哈哈


之後我們還開了第1次暖氣(6299每晚都開，還叫我們開，但其實之前都不叫太凍，我買的那張蠶絲被好夠暖)，但因為當晚都凍，所以我們就開了今個冬天第1次暖氣，舒舒服服地看電視 (張生很快睡著了，他是那種1.5秒就睡著的人=='')
我all和痛了1個下午，腳都軟了，看了一會，都快快地睡覺了 hahaha.....

其實這樣我已覺得好足夠好幸褔，我不用什麼節目、大餐，能夠舒舒服服地與他一起在家就已足夠。
我倆的our room那時更發揮作用，很溫暖！

Pre-wedding taken by us @Korea

自11月頭韓國回來後，一直都未得閒，最近開始整第1本相薄，將之前朋友幫我地影，同埋我地係韓國自拍的相影相薄後，d相終於揀了和再被朋友加了點effect。
下面係一些相薄內既相，頭2張係picasso wedding MUA幫我地影既snapspots，跟住下面那些就係我地用腳架影的。

其實唔開心，因那幾天都落雨，去南怡島又落大雨，到最後果日先有陽光出來。

Pre-wedding@弘大

Pre-wedding@韓屋

自拍@南怡島
當日去到先發現無pack張生件白恤衫到gip內，那刻真的好唔開心，重諗使唔使轉行程，當晒了車費就算，但又覺得來到又唔影好可惜，
幸好當日張生著了紅色格仔恤衫，因去完南怡島後會去小法國村，那裡只可著便服影相，那件紅色格仔恤衫都襯到白色禮服。哈！

影完呢張後，就落超大雨，就這樣被迫結束南怡島的拍攝。
但其實那日全日都下細雨，我地係落住細雨咁影每一張相，個地下是泥地，全濕的。
當日係超凍，但影既時候，竟然feel唔到太凍。哈哈，人既意志真的大於一切。

之後我地又趕去小法國村影小王子，那裡還比南怡島再凍多一點=.='''

到最後一日，太陽才出來，我們唔放過，早上趕去首爾大公園，又拍了一些才結束Korea pre-wedding之旅。

首爾大公園內的景色都很美麗，可惜時間唔夠，只能快快影。